Туындылары
***
Қажыдым, білем, шаршадым,
Тас қала мені жауратты.
Жанымды ұғар басқа кім?
Өлеңнен өзге қалмапты...
Қарайлай берем несіне?
Дүние салды сарсаңға.
Ілеспей керуен көшіне,
Құдайға кетіп қалсам ба?..
Шытынап төзім әйнегі,
Сетінеп жібі сезімнің.
Құрғамады ғой, әй, тегі,
Сорасы қара көзімнің.
Сағынтып өткен сан жылдар,
Сарыла күткен шақтарым.
Бәрің де артта қалдыңдар,
Біріңнен опа таппадым.
Ұрлады уақыт аяусыз,
Қимасым менен барымды.
Жүрегім – жыртық, көңіл – сыз,
Бармақтай жандыр бағымды!..
04.02.2022