Туындылары
МЕЙІРЛІ БОЛ
Пәк күйінде сақтай алмай ,
Ауырлаттым денемді.
Ана сүтін ақтай алмай,
Артқан күнәм көп енді.
Шыбын жаным ұшып кетсе,
Бүкіл тәнім түкке аспай.
Қамалады түн түнекке,
Енді қайта шықпастай.
Үш жерімнен байланамын,
Көнбесіме көндіріп .
Топыраққа айналамын,
Құрт-Құмырсқа жем қылып.
Оңыма иә терісіме,
Аунай алмай жаудырап.
Қорқынышты көр ішінде,
Сүйек жатар саудырап.
Мүңкір- Нәңкүр жорығына,
Қалай төтеп беремін.
Намазымның орынына,
Өтпейді ғой өлеңім
Басқа өнерді тоқтат- демек,
Онымды жоқ құптаған.
Өлең жазшы, жазшы әпке деп,
Өтінеді жұрт маған .
Санаспайды ақынбысың,
Бақи жалған не шара .
Саудаласып отырмысың,
Сәждеңді сүй бейшара.
Барарың сол , көрерің сол,
Жол таппайсың қиялдан.
Мен байғұсқа мейірлі бол,
Мейірлі бол, я Аллам.