Өмірдерек
Иса ОМАР – жазушы-журналист, Қазақстан Жазушылар одағының, Қазақстан Журналистер одағының, Қазақстан Авторлары қоғамының мүшесі, Оңтүстік Қазақстан облысының құрметті азаматы, Қазақстанның құрметті журналисі.
Иса ОМАР (Тасқұлов Иса Омарұлы) 1958 жылы 26 желтоқсанда Оңтүстік Қазақстан облысы, Қазығұрт ауданындағы Қаржан ауылында дүниеге келген. 1981 жылы Алматыдағы ҚазМУ-дің журналистика факультетін бітірген. Еңбек жолын сол жылы Арқалық қаласында Торғай облыстық «Торғай таңы» газетінде тілші болып бастаған. 1983 жылдан бастап Оңтүстік Қазақстан облыстық «Оңтүстік Қазақстан» газетінде тілші, жауапты хатшының орынбасары, бөлім меңгерушісі қызметтерін атқарды. 1990 жылы ол республикада тұңғыш рет қазақ тілінде тәуелсіз «Жас дәурен» (кейіннен «Замана») атты газет ашты. 1992-1998 жылдар аралығында Оңтүстік Қазақстан облысы әкімдігінің тұңғыш баспасөз хатшысы лауазымында мемлекеттік қызмет атқарды. 1998 жылдың 1 қаңтарынан бастап республикалық «Замана» тәуелсіз газетінің құрылтайшысы әрі бас редакторы. 2003-2006 жылдары Оңтүстік Қазақстан облыстық «Оңтүстік Қазақстан» газетінің бас редакторы. 2006 жылдан бері «Замана» Баспа үйі редакторлар кеңесінің төрағасы, «Замана» серіктестігінің директоры. Қаламгер Иса Омардың Алматы, Шымкент, Ташкент, Бішкек қалаларындағы баспалардан 10-нан аса кітабы жарық көрген. Прозалық, поэзиялық, публицистикалық шығармалары орыс, өзбек, қырғыз тілдеріне аударылған. Иса Омардың кітаптары:
1. «Аяқталмаған ән».
2. «Ақ жаңбыр».
3. «Арғы жағы мұхиттың, бергі жағы».
4. «Жүрек сөзі».
5. «Замана».
6. «Адамдық қағидасы».
7. «Таразы».
8. «Изнанка изящнего» (орыс тілінде).
9. «Қушиқчи қиз қисмати» (өзбек тілінде).
10. «Бүтпөгөныр» (қырғыз тілінде).
11. «Ак жамгыр» (қырғыз тілінде).
Қаламгердің шығармалары «Тәуелсіздік толғауы», «Қазақтың 100 термесі», «Өзіміз ұшқан ұя» сияқты басқа да бірқатар жинақтарда жарияланған. Иса Омар қаламгерліктен бөлек, сазгерлігімен де танылған қаламгер. Ол 200-ден астам әндердің авторы. Оның әндері мен толғаулары, термелері ноталарымен «Иса Омардың әндері» деген атпен жеке кітап болып жарық көрген, сондай-ақ түрлі жинақтарға енген. Автордың «Сағыныш», «Жүрек сөзі», «Өмір толы қайшылыққа» атты ән-альбомдары мыңдаған таралыммен жарыққа шыққан.
Иса Омардың әні мен сөзіне жазылған «Алға, қазағым!», «Жүрек сөзі», «Досқа сыр» және басқа да бірқатар әндері танымал әншілердің орындауында республикалық Қазақ радиосының «Алтын қорына» енген. Иса Омардың бүгінде 100-ден астам әні ел ішінде орындалып жүр. Тәрбиелік мәні бар бірқатар әндері қазақ әншілерінен бөлек, қырғыз және өзбек орындаушыларының да репертуарына енген. Автордың кейбір әндері түрік және орыс тілдерінде де орындалған. Иса Омардың ой-толғамдар мен төрттағандардан тұратын «Пайым патшалығы» атты жаңа кітабы жақын күндері баспадан жарық көрмек.