Туындылары
БІРАҚ ЕНДІ
Адамдар!
Менің мәңгі бір ғана серігім бар,
Өлең дейтін жетімек елігім бар.
Сендер жүрген жолменен жүргенім жоқ,
Ешкімде жоқ ерекше өмірім бар.
Адамдар!
Қара түндей тұмшалап тұрса қайғым,
Етегіне қонады шық самайдың.
Сендер өткен өзеннен өткенім жоқ,
Тағдырым бар, басқаға ұқсамайтын.
Адамдар!
Мейлі бірің кінәлап, өшігіңдер,
Жоқ, – деп бірің атымды өшіріңдер.
Бірақ, ешкім қайталай алмайтұғын,
Махаббатым үшін, тек, кешіріңдер.