Туындылары
ТІЛ
О, қызыл тіл, құдіретің соншама
Сарқылмайсың сөз жаңбырын құйып кіл,
Мынау дүние қаншама үлкен болса да
Титтей саған сыйып тұр!
Дұшпанымды қалтыратып, ұшығып,
Ұйытқытып соғасың-ау борасын.
Шырылдатып зәре-құтын ұшырып,
Шыбын жанын аласың.
Кей көңілдің қара шойын түнегін
Жарып туар жарығы мол айдайсың.
Жырақтағы біреулердің жүрегін
Жүрегіме байлайсың.
Жарқылдайсың, жарыласың бір уақыт
Айқыш-ұйқыш найжағайлар арттырып,
Дүниені сақыр-сұқыр ырғатып,
Жібересің лақтырып.
Жүрегімнің бал шүмегін ағытып
Ғашығыма төгесің-ау жақсылық,
Махаббаттың шарабына тоғытып,
Қоясың тез мас қылып.
Тілім саған, тілегім бар: өзіңді
Байқап ұста, жаңылыспа әрдайым,
Жалғандағы жаным деген досымды
Жауым етіп алмайын!