Туындылары

АСЫЛ АРМАН

Бозторғай әнге қосып бұла таңын
Тіршілік қызған шақты ұнатамын.
Көз тоймай туған жердің келбетіне
Тамсанып гүлдерге өскен тербетіле.
Кеудемде күй күмбірлеп, тасыған жан,
Соларды жырға қосу – асыл арман.

Аралап кең өлкемнің атырабын,
Беу, жастық! Дүрліктіріп жатыр әнің.
Жазира дархан далам, сырға тұнған –
Аумайсың дихан қыздың сымбатынан.
Жалының қайрат беріп, тасынар жан,
Өзіңді жырға қосу – асыл арман.

Паш етіп ұлы еңбекпен асқақ атын,
Өркен жайған ұрпағы – жас қанаты,
Адамдар – замандастар, армандастар,
Сендермен мақсатым бір алға бастар.
Даңқыңнан шабыттанып тасынар жан,
Сендерді жырлап өту – асыл арман.